Todos os autores de traballos que se publiquen na páxina web do IV Congreso CLMNTK recibirán unha certificación de autoría e serán premiados cunha camiseta, un caderno, un bolígrafo, unha banda deseñada e unha novela do proxecto Climántica. Pero ademais un número máximo de oitenta e dous (82) autores serán premiados por traballos individuais ou en parellas con campamentos ambientais de verán, que se reparten por niveis educativos tal e como se indica abaixo. Un número máximo de cincuenta (50) poderán ser premiados cun itinerario ambiental por Galicia por traballos en grupos de 3 ou máis membros
Premios en campamentos ambientais de verán por niveis e etapas educativas (individuais ou máximo 2 estudantes)
Estes premios faranse públicos na web principal de Climántica o día 5 de xuño de 2011. Na valoración terase en conta tanto a votación dos usuarios da páxina web do congreso como a valoración outorgada por un xurado formado por educadores e que emitirán a súa cualificación fixándose nos seguintes criterios:
- Que exista unha relación clara co proxecto.
- Orixinalidade.
- Elaboración rigorosa.
- Capacidade de sensibilización.
- Grao de madurez na elaboración técnica.
- Que se mostren relacións entre coñecementos diferentes e a comprensión dos mesmos.
As votacións dos usuarios da web empezarán a contar dende o momento da publicación e as valoracións quedarán resoltas para cada traballo nun prazo máximo dunha semana despois da súa publicación. A plataforma informará daqueles traballos que reciban máis votos, que presentará como máis populares, e tamén dos máis valorados, a medida que se vaian tendo valoracións semanais do xurado.
- Premio xeral de ESO, Bacharelato e Ciclos formativos a 40 alumnos. O premio consistirá nunha estancia de 5 días que inclúe todos os gastos dende a saída en autobús dende Santiago o día 22 de xuño ata o regreso á mesma cidade o 26 de xuño de 2011. A estancia e actividades desenvolveranse en equipamentos da Dirección Xeral de Xuventude da Xunta de Galicia, que colaborará aportando gastos de estancia e manutención. A estancia seguirá a mesma metodoloxía da do curso anterior. Haberá por tanto un programa de actividades deseñado para estimular a convivencia, o traballo en equipo e a creatividade mediante actividades náuticas, de astronomía, orientación, pequenos proxectos de expresión artística en grupos de traballo, pequenas investigacións, xogos, actividades na natureza e veladas nocturnas. Das 40 prazas, 30 quedan reservadas para os estudantes de Galicia e as 10 restantes poderían chegar a ser ocupadas por estudantes doutros comunidades autónomas ou de Portugal, sempre e cando lle correspondera dentro da valoración xeral. En todo caso, os únicos desprazamentos que quedan cubertos para todos os premiados, nesta e nas demais modalidades, son os de ida e volta entre Santiago e o lugar do equipamento onde se desenvolverán os campamentos, que se dará a coñecer nesta web e mediante correo electrónico a todos os premiados. Ao rematar o campamento entregaráselle un diploma coas actividades de formación nas que participou e a súa duración.
- Premio para estudantes de Primaria a 30 alumnos escolarizados en centros de Galicia. O premio consistirá nunha estancia de 4 días que inclúe todos os gastos dende a saída en autobús dende Santiago o día 27 de xuño ata o regreso á mesma cidade o 30 de xuño de 2011. A estancia e actividades desenvolveranse en equipamentos da Dirección Xeral de Xuventude da Xunta de Galicia, que colaborará aportando gastos de estancia a manutención. Ao igual que o curso anterior, neste campamento infantil desenvolveranse obradoiros, xogos, pequenas obras de teatro, actividades na natureza. Ao rematar o campamento entregaráselle un diploma coas actividades de formación nas que participou e a súa duración.
- Premio xeral para estudantes universitarios a 12 estudantes de grao ou posgrao. Neste caso quedan reservadas 8 prazas para estudantes galegos e poderían chegar a ocuparse por estudantes doutras comunidades autónomas e de Portugal un máximo de 4, sempre e cando lles correspondera dentro da valoración xeral. Estes estudantes serán premiados por achegas de contido á plataforma Wiklimántica. O xurado e os criterios son os mesmos que os das etapas non universitarias, e para a valoración teranse en conta tanto os proxectos creados, como o valor das interaccións con expertos, melloras doutros proxectos e incluso críticas positivas aportadas. Os gañadores terán que colaborar no deseño e aplicación de actividades formativas para os campamentos de Primaria ou para os de Secundaria, e outorgaranse as prazas tendo en conta a orde na que quedaron valorados e a súa elección do campamento de Primaria ou do de Secundaria. A participación no campamento como educadores en prácticas suporá unha certificación de 50 horas de formación.
Premios especiais a grupos de 3 ou máis persoas
- Grupos de 3 a 30 alumnos que presenten obras de teatro, cancións, dramatizacións ou outro tipo de traballos en grupo, establécese como premio un itinerario educativo en Galicia que se celebrará o luns 20 de xuño de 2011. Outorgarase o premio do itinerario ambiental a un número máximo de 50 estudantes.
